LlGC Llsgr. Peniarth 19 – tudalen 102r
Brut y Tywysogion
102r
453
ystrat clut y ruuein. Ac y bu
uarỽ Jdwaỻaỽn uab einyaỽn.
ac eilweith y diffeithaỽd einy+
aỽn whyr. ac y diffeithỽyt ỻỽ+
yn kelynaỽc uaỽr y gan ho+
wel uab Jeuaf a|r saesson. ac
yna y delit Jago. ac y goruu
howel uab Jeuaf. ac y goresgyn+
naỽd kyuoeth Jago. ac y ỻas
Jdwal. a|gỽedy hynny y diffei+
thaỽd custennin uab Jago. a
gỽthric uab herald lyyn a
mon. A gỽedy hynny y ỻas cus+
tennin uab Jago. y gan hoỽel
uab Jeuaf yn|y vrỽydyr a|elw+
ir gỽeith hirbarth. Pedwar
ugein mlyned a naỽ cant oed
oet crist. pan diffeithaỽd gotbric
uab herald dyuet. a mynyỽ.
ac y bu weith ỻann wanaỽc. ac
yna y diffeithỽyt brecheinaỽc.
a hoỻ gyuoeth einyaỽn uab
owein y gan y saesson. ac al+
vryt yn dywyssaỽc arnadunt.
a howel uab Jeuaf ac einyaỽn
a|ladaỽd ỻawer o|e lu. ac yna y
ỻas einyaỽn uab owein drỽy
dỽyỻ y gan uchelwyr gỽent.
ac y bu varỽ bonhedic escob.
ac y lladaỽd y saesson howel
uab Jeuaf drỽy dỽyỻ. ac y llas
Jonaual uab meuric. a|chatw+
454
aỻaỽn uab Jeuaf a|e ỻadaỽd.
Katwaỻaỽn uab Jeuaf drỽy
vudugolyaeth a|oresgynnaỽd
y gyuoeth. nyt amgen noc
ynys von a meiryonnyd. a
hoỻ wladoed gỽyned o diruaỽr
ystryỽ a chaỻder a darostynga+
wd. Ac yna yd yspeilỽyt ỻyỽ+
arch uab Owein o|e lygeit.
ac y diffeithỽyt gotbric uab
herald a|r ỻu du ganthaỽ o
von. ac y delit dỽy vil o|dynyon.
a|r dryỻ araỻ o·nadunt a duc
maredud uab owein ygyt ac
ef y geredigyaỽn a dyuet. Ac
yna y bu uarỽolyaeth ar yr
aniueileit drỽy hoỻ ynys bry+
dein. Ac yna y bu uarỽ Jeuaf
uab Jdwal. ac owein uab hoỽel.
ac y|diffeithaỽd y kenedloed
lann badarn. a mynyỽ a ỻann
uỻtut. a ỻann garban. a ỻann
dydoch. Ac yna y ỻas Mab ab+
loyc. ac y talaỽd maredud yn
deyrnget y|r kenedloed duon
geinyaỽc o bop dyn. ac y bu
diruaỽr uarỽolyaeth ar y dy+
nyon rac newyn. ac y ỻas owe+
in uab dyvynwal. ac y diffeith+
aỽd maredud vaes hyfeid. Deng
mlyned a phedwar ugeint a
naỽ cant oed oet crist pan diffeith+
| « p 101v | p 102v » |