LlGC Llsgr. Peniarth 19 – tudalen 110v
Brut y Tywysogion
110v
487
ef a|e ganhorthỽywyr. Ac yn
gywarsagedic o dra·lluosso+
grỽyd niuer y kymerth y fo.
a|e ymlit o|r brenhin yny de+
lis ac ef a|e wyr. A gỽedy eu
daly a|e hanuones y loegyr
o|e carcharu. a hoỻ norman+
di a darostygaỽd ỽrth y
vedyant e|hun. Yn|y vlỽydyn
honno y ỻas meuric a grif+
ri veibyon trahaearn uab
karadaỽc. ac owein uab
kadỽgaỽn. Y vlỽydyn rac+
wyneb y dienghis maredud
uab bledyn o|e garchar. ac
y doeth y wlat. Ac yna y bu
varỽ etwart uab y moel cỽ+
lỽm. Ac yn|y le ef y kynhelis
alexander y vraỽt y deyrnas.
Y ulỽydyn gỽedy hynny yd
anuonet nebun genedyl di+
adnabydus herỽyd kenedyl+
aeth a moesseu ny wydit
pa le yd ymgudyassynt yn
yr ynys dalym o vlỽynyded
y gan henri vrenhin y wlat
dyuet. a|r genedyl honno
a achubaỽd hoỻ gantref
ros geyr·ỻaỽ aber yr auon
a|elwir cledyf gỽedy eu
gỽrthlad o gỽbyl. a|r gene+
dyl honno megys y|dywe+
488
dir a hanoed o flandrys y w+
lat yssyd ossodedic geyr·ỻaỽ mor
y brytanyeit. o achaỽs achub
o|r mor a|goresgyn eu gỽlat
yny ymchoelet yr hoỻ a|r ag+
krynodeb heb dỽyn dim frỽyth
gỽedy bỽrỽ o lanỽ o|r mor y
tywot dros y tir. ac yn|y diwed
gỽedy na|cheffynt le y bressỽ+
ylaỽ. kanys y mor a|dineuas+
sei ar draỽs yr aruordired. a|r
mynyded yn gyflaỽn o dyny+
on mal na eỻynt oỻ bressỽyl+
aỽ yno o achaỽs amylder y
dynyon a bychanet y tir. y ge+
nedyl honno a deissyfaỽd henri
vrenhin ac a|adolygassant i+
daỽ gael ỻe y pressỽylynt yn+
daỽ. ac yd anuonet ỽynt hyt
yn ros gan wrthlad o·dyno
y priodolyon giwdaỽtwyr.
y rei a|goỻassant eu priaỽt
wlat a|e ỻe yr hynny hyt he+
diỽ. Y|ghyfrỽng hynny ger+
alt ystiwart penvro a rỽndỽ+
alaỽd casteỻ kenarth bychan
ac ansodi a|wnaeth yno. a
ỻehau yno y hoỻ o·ludoed
a|e wreic a|e etiuedyon a|e hoỻ
anỽylyt. a|e gadarnhau a
wnaeth o glaỽd a mur. Y
ulỽydyn rac·wyneb y parato+
es
| « p 110r | p 111r » |