Llsgr. Philadelphia 8680 – tudalen 33r
Brut y Brenhinoedd
33r
49
ewyỻys arthur. Ac ỽrth hyn+
ny hoỻ dywyssogyon Jwer+
don. rac ofyn a|doethant.
ac o agreifft oc eu bod a ym+
rodassant yn wyr y arthur.
A Gỽedy daruot y arthur
oresgyn hoỻ iwerdon
a|e|hedychu. ef a|aeth hyt
yn islont yn|y lyghes. A|gỽe+
dy ymlad a|r|bobyl honno.
ef a|e goresgynnaỽd.
Ac odyna dros yr ynyssed
ereiỻ yd aeth clot arthur.
ac na aỻei un deyrnas gỽr+
thỽynebu idaỽ. Doldan
brenhin godlont. a Gỽin+
was vrenhin orch oc eu|bod
a|deuthant y ỽrhau y arthur
gan dalu teyrnget idaỽ
bob blỽydyn. Ac odyna
gỽedy ỻithraỽ y gayaf hỽn+
nỽ heibaỽ. Arthur a ym+
choelawd dracheuyn hyt
yn ynys prydein. y atnewy+
du ansaỽd y deyrnas. ac y
gadarnhau tagneued yndi
50
Ac yno y bu deudeg mly+
ned ar untu. ~
A C yna gỽahaỽd attaỽ
marchogyon deỽr
clotuaỽr araỻwladoed a
pheỻteyrnassoed. ac amyl+
hau y deulu. Megys yd o+
ed gyghoruynt gan teyr+
nassoed peỻ y ỽrthaỽ me+
int clot y lys. a roottres
y deulu a|e molyant.
A|cheissaỽ a|wnaey baỽb
kyffelybu a|disgyblu y
ỽrth lys arthur. ac y ỽrth
y uarchogyon a|e deulu.
Kanyt oed dim gan un
dylyedaỽc yn|y teyrnasso+
ed peỻ y ỽrthunt ony eỻ+
ynt ymgyffelybu a mar+
chogyon arthur oc eu
gỽisgoed. ac oc eu harueu.
ac oc eu marchogaeth.
A gỽedy ehedec clot ac
a|e uolyant dros eithauo+
ed y byt. Ofyn a gymer+
assant brenhined tramor
| « p 32v | p 33v » |