LlGC Llsgr. Peniarth 19 – tudalen 118v
Brut y Tywysogion
118v
519
galỽ o gediuor uab gronỽy
a howel uab jtnerth. a thraha+
earn uab jthel. y rei a|oedynt
yn|dynessau o gyfnassafrỽyd*
gerennyd a chyfadnabot. a
duunaỽ arglỽydiaetheu idaỽ
a|r rei hynny a|oedynt gyt
ac|ef ymblaen hoỻ|wyr kere+
digyaỽn. ac nyt oed yn dyn
a|aỻei vot yn|direidyach no|r
kediuor hỽnnỽ y|r wlat ang+
kyffredin kyn·noc adaỽ dyuet
yn ỻaỽn o amryuaelyon ge+
nedloed. Nyt amgen flemissy+
eit a freingk a|saesson. a|e giỽ+
daỽtwyr genedyl e|hun. y|rei
kyt beynt vn genedyl a|gỽyr
keredigyaỽn. Eissyoes ge+
lynaỽl gaỻonneu oed gan+
thunt o achaỽs eu hanes+
mỽythdra a|e hanuundeb kyn+
no hynny. ac yn vỽy no hyn
rac ofyn y tremyc a|wnath+
oedynt y henri vrenhin. y
gỽr a dofhaassei hoỻ bena+
duryeit ynys brydein o|e
aỻu a|e vedyant. ac a|daros+
tygassei lawer o wladoed
tramor ỽrth y lywodraeth.
Rei o nerth arueu. ereiỻ o
anneiryf rodyon eur ac ary+
ant. y|gỽr ny aỻei neb ym+
osgryn ac ef dyeithyr duỽ e
hun. y neb a rodassei y med+
yant idaỽ. A|gỽedy dyuot gru+
520
fud uab rys y geredigyaỽn. yn
gyntaf y doeth y is coet. Ac yna
y|kyrchaỽd blaen porth hod+
nant. yno yd adeilyassei neb+
un flemissỽr. ac yno y dathoed
y flemissyeit y drigyaỽ. A|gỽedy
ymlad dydgỽeith ar|hyt y|dyd.
a|ỻad ỻawer o wyr y|dref. a|ỻad
vn o|e wyr ynteu. a|ỻosgi y ran
vỽyaf o|r dref. heb gael dim
amgen no hynny yd ymchoel+
aỽd drachefyn. Odyna y ruth+
raỽd gỽyr y wlat attaỽ o dieflic
annogedigaeth yn gyfun me+
gys yn deissyfyt. a|r saesson a
dugassei gilbert kynno hynny
yr kyflenwi y wlat. yr honn
kynno hynny o an·amylder
pobloed a|oed wac valch a diff+
eithyassant ac a|ladyssant ac
a yspeilyassant. ac a losgassant
y tei. a|e hynt a|e kynnỽryf veỻy
a dugassant hyt ym|penwedic.
a chylchynu a|orugant gasteỻ
razon ystiwart oed ossodedic
yn ystrat peithiỻ. ac ymlad
ac ef a|orugant. a|e orchyuygu.
A|gỽedy ỻawer yndaỽ y losgi
a|wnaeth·ant. A|phan doeth y
nos y pebyỻyaỽd yg|glasgruc.
mal ar viỻtir y ỽrth eglỽys
badarn. A|r bore drannoeth ym+
aruaethu a|wnaethant a chas+
teỻ aber ystỽyth ar vedỽl gor+
uot arnaỽ. Ac yna yd anuones
| « p 118r | p 119r » |