Rhydychen, Llsgr. Coleg yr Iesu 111 (Llyfr Coch Hergest) – tudalen 141r
Proffwydoliaeth Sibli Ddoeth
141r
576
mỽy no|r tywaỽt yn|y weilgi. Pan welo
y brenhin y ruueinyeit y geilỽ y lu. ac y ry+
uela ac ỽy. ac y ỻad hyt y teruyn eithaf.
a gỽedy hynny y|daỽ y gaerusalem. Ac yno
y gỽrthyt coron y teyrnas. a|phop brenhinaỽl
abit y|dedyf y deyrnas y duỽ dat. ac yn har+
glỽyd ni iessu|grist. Yn|y oes ef y deuant
y deu egluraf nyt amgen elẏ ac enoc. y ue+
negi bot yn|dyuot rac ỻaỽ. ac y|ỻad yr anti+
crist y rei hynny. a|r trydyd dyd y kyuodant
trỽy duỽ. ac yna y|byd diwreid maỽr. y kyf+
ryỽ ny bu na|chynt nac gỽedy. Yr arglỽyd
a uyrhaa y dydyeu hynny o achaỽs y etholedi+
gyon. a|mihangel a|lad yr anticrist ym my+
nyd oliuet. Gwedy rac·uenegi o|sibli y
petheu hynn. a ỻawer o|betheu ereiỻ o|r a|del+
ynt rac ỻaỽ. ac yma arỽydon y daỽ duỽ y
uarnu. a sibli a|dywaỽt o|deỽindabaeth.
Arỽyd y uarn a|wylch* y|dayar o|chwys. O|r
nef y|daỽ brenhin rac ỻaỽ drỽy oessoed yn|y
gnaỽt y uarnu y|r byt. Odyna ffydlaỽn ac
anfydlaỽn a|welant duỽ goruchel ygyt a
seint yr oes yn|y|teruyn hỽnnỽ. Ac yna y
deuant yr eneideu yn eu|corforoed y|r uarn.
Yna y|bydant drem amyl yn|y dayar anyw+
yỻedic. Ac y|bỽrỽ y bedeu y uyny a uo yndunt.
ac y|ỻysc tan y daear. a|r awyr. a|r weilgi.
ac y|tyrr pyrth y tywyỻ uffern. Ac y rod+
ir y|r eneideu da. ryd oleuat. ac y|r rei drỽc
flam tragywydaỽl ac eu|ỻysc. Ac yna yd
adef paỽb y|dirgeledigyon pechodeu. Duỽ
a|ardengys kedernit goleuat. Yna y byd
kỽynuan. a chrynu danned. Yna y tywyỻa
yr heul. ac y|dyrcheuir geỽri yn|y syr. ac y
try y nef. Ac y paỻa goleurỽyd y|ỻeuat.
Yna y gostyngir y|ỻeoed uchel. ac y dyrche+
vir y glynneu. Ny|byd nac uchel nac issel ar
y|dayar ny weler yn gyn|wastattet. Yna y
gorffowys pop peth. ac y paỻa y daear yn
dorredic. Ac yna y ỻysc tan yr auonyd. a|r
ffynhonneu. ac yna y|daỽ ỻef o|r nef. corn
o|r goruchelder praff y odỽrd. ac y byd trist
y rei truein yn kỽynaỽ eu pechaỽt oc eu ham+
577
ry·uaelon lauuryeu. Ac yna y|dengys y|dengys
y|dayar. uffernaỽl defnyd. ac yg|gỽyd y dan+
sodir po b peth. ac y|byrir. ac yna y dygỽyd
tan brỽnstanaỽl o|r nef a|dỽfyr o|r un
defnyd. Ac ar hynny y teruyna proffỽydo+
lyaeth sibli gyt a|e breudỽyt ~ ~ ~
Kyuoessi myrdin a|gỽendyd y|chỽaer.
| « p 140v | p 141v » |