Breudwd Rhyddiaith Gymraeg 1300-1425
English

LlGC Llsgr. Peniarth 19 – tudalen 136v

Brut y Tywysogion

136v

591

wenuynic nerthoed yn erbyn
y veint arderchaỽc dywyssaỽc
hyt na aỻei ystoryaeu ystas
ystoryaỽr. na chathleu fferyỻ
vard. menegi y veint gỽyn+
van a|dolur a|thrueni a doeth
y hoỻ genedyl y brytanyeit
pan|dorres agheu yr emeỻ+
digedic vlỽydyn honno o+
lỽyn y tyghetuenneu y gym+
ryt yr arglỽyd rys uab gruf+
fud dan y hadaned dan daros+
tỽg uedyant agheu y|gỽr
a|oed benn a|tharyan a che+
dernyt y deheu a hoỻ gymry
a|gobeith ac amdiffyn hoỻ
genedyl y brytanyeit. Y gỽr
hỽnnỽ a hanoed o vonhedic+
kaf lin brenhined. ac oed e+
glur o amylder kenedyl. a
grymuster y vedỽl a|gyffe+
lybaỽd ỽrth y genedyl. Kyg+
horỽr y dylyedogyon. Ymlad+
gar yn erbyn y kedyrn. Di+
ogelỽch y darostygedigyon.
ymladwr a|r|geyryd. Kyffro+
ỽr yn ryueloed. kyweirỽr yn|y
bydinoed Cỽympỽr y|toru+
oed. ac megys baed neu leỽ
yn ruthraỽ veỻy y dywalei
y greulonder ynteu y elyny+
on. Och am ogonyant yr
ymladeu. Taryan y marcho+
gyon. Amdiffyn y|wlat. Tegỽch
arueu. Breich y kedernyt ỻaỽ

592

yr haelon. ỻygat y dosparth. Ych+
tywynnwr yr aduỽynder. vchel+
der maỽrvrydrỽyd. Defnyd y
grymuster. Eil achelarỽy o
nerth cledyr y dỽyvron. Nestor
o hynaỽster. Tideus o|leỽder
Samson o gedernyt. Ector o
brudder. Erkỽlff o wychter. Pa+
ris o bryt. Vlixes o lauar Selyf
o|doethineb. aiax o vedỽl. a|grỽn+
dwal yr hoỻ gampeu. 
G wedy marỽ yr arglỽyd
rys y dynessaaỽd gruf+
fud y vab yn|y ol yn ỻywodra+
eth y kyuoeth. yr hỽnn a|delis
maelgỽn y vraỽt. pan doeth
y dywededic vaelgỽn gỽedy y
ry aỻtudaỽ kynno hynny o|e
gyuoeth a|e wyr ygyt a theu+
lu gỽenwynỽyn ygyt ac ỽynt
hyt yn aber ystỽyth. a gores+
gyn y dref a|r casteỻ. a|ỻad ỻaw+
er o|e bobyl. a|dỽyn ereiỻ yg|kei+
thiwet. a goresgyn hoỻ gere+
digyaỽn a|e chestyỻ. A gỽedy da+
ly gruffud vraỽt yd anuones
y garchar gỽenỽynwyn. a|hỽn+
nỽ herỽyd y ewyỻus a|e han+
uones y garchar y saesson.
Ac yna y goresgynnaỽd gỽen+
wynwyn arỽystli. ac y delis
ỻywelyn uab Jorwerth. a|dauyd
uab owein gỽyned. Y vlỽydyn
honno y bu uarỽ owein keuei+
laỽc yn ystrat marcheỻ. wedy