Rhydychen, Llsgr. Coleg yr Iesu 111 (Llyfr Coch Hergest) – tudalen 213v
Ystoria Bown de Hamtwn
213v
858
ar y gennadỽri honno. kymer y wisc las
racco. brethyn odidaỽc yỽ o|r parth draỽ y|r
mor. Y wisc a gymerth y gennat. a|thrache+
uyn at iosian y deuth. a menegi idi na doi
ef y ymỽelet a hi. Gouyn idi hitheu pỽy
a|rodassei y|wisc odidaỽc honno idaỽ ef.
boỽn heb ynteu. Myn mahumet vyn|duỽ
kelwyd oed dywedut y uot ef yn|vilein. a
chany daỽ ef y ymỽelet a miui. Miui a|af
y ymwelet ac euo. ac rocdi y kerdaỽd hi
yny doeth y|r ty yd oed boỽn yndaỽ. ac ual
y gỽyl ef hihi yn dyuot. kymryt idaỽ yn+
teu y uot yn kyscu. a|chỽyrnu yn vchel a|ỽ+
naeth ef. dyuot a|oruc hi racdi yny doeth
hyt y gỽely. ac eisted ar erchỽyn y gỽely
a|ỽnaeth hi a|dywedut ỽrthaỽ. arglỽyd
tec duhun yd oed ym ychydic ymdidan a
uynnỽn y dywedut ỽrthyt. pei da gan dy
anryded di y warandaỽ. A vnbennes heb+
y boỽn ỻudedic a|briwedic ỽyf|i. ac ymhỽ+
yth taỽ a|th son ỽrthyf. a gat ym orffowys.
ac ys drỽc a|beth y|diolcheist di ymi vy
ỻauur. Sef a|ỽnaeth hitheu yna. eỻỽng
y dagreu yn hidleit. yny wlychaỽd y hỽy+
neb hi oỻ gan y dagreu. ac ual y gỽyl
ef hi yn|y dryc·yruerth hỽnnỽ. truanhau
yn|y gallon a|ỽnaeth ỽrthi. Ac yna y
dywaỽt hi drỽy y hỽylaỽ ỽrthaỽ ef. Ar+
glỽyd heb hi trugarhaa di ỽrthyf|i. ac
o|r|dywedeis eireu cam ỽrthyt. mi a|wnaf
iaỽn itt ỽrth dy uod. ac yn yghwanec
mi a ymwadaf a mahumet. ac a|gredaf
y iessu grist y gỽr a|diodeuaỽd agheu ym
prenn croc. ac a|gymeraf gristonogaeth
yr|dy garyat. Sef a|wnaeth ynteu yna
kyuodi yn|y eisted. a dodi y dỽylaỽ am y
mynỽgyl hi a|rodi cussan idi. Sef yd oed+
ynt yn edrych arnunt yn ymgussanu.
y deuỽr a|rydhayssei ynteu o garchar brat+
mỽnt. ac ar hynt ỽynt a gyrchassant er+
min. ac a|dywedassant ỽrthaỽ. bot boỽn
yn gỽneuthur keỽilyd a sarhaet uaỽr id+
aỽ. kan ytoed ef yn kit·gyscu. a|e uerch.
859
ac yn gỽneuthur y ewyỻys ohonei. Sef
a|ỽna·eth ermin yna ỻidyaỽc ac o|lit tynnu
gỽaỻt y benn a|e varyf. a gofyn udunt a|oed
wir hynny. tyngu ỻyein maỽr udunt ỽyn+
teu y uot yn wir. Mae aỽch kynghor chỽi
heb·yr ermin. kanys o pharaf y lad neu y
grogi. kynt y bydaf uarỽ noc ef. o achaỽs
y uot yn vab maeth im a|meint y karaf
ef. Mi a|ỽn gynghor da heb un o·nadunt.
peri ohonat ti ysgriuennu ỻythyr att brat+
mỽnt. Ac erchi yn|y ỻythyr kymryt y am+
dygyaỽdyr a|e|dodi yn yr|eol gadarnaf yn|y
helỽ. a|e laỽnueich o heyrn arnaỽ. ac na eỻyg+
it odyno hyt tra|uei vyỽ. ac erchi y boỽn uy+
net a|r ỻythyr att bratmỽnt. a chymryt y|lỽ
ynteu ar y gristonogaeth na|s|dangossei y ỻy+
thyr hỽnnỽ y neb onyt y vratmỽnt e|hun.
a minneu a|wnaf hynny heb·yr ermin. A|r
ỻythyr a|wnaethpỽyt. ac ar|boỽn y gelỽit.
ac yn·teu a doeth racdaỽ. Ac ermin a|dywaỽt
ỽrthaỽ. Reit vyd itt heb ef kymryt y ỻythyr
hỽnn. a mynet ac ef hyt yn damascyl att
vratmỽnt. Ac erchi idaỽ gỽneuthur kym+
meint ac yssyd yn|y ỻythyr. a|thyngu y|th grist+
onogaeth di ac ar|dy|ffydlonder na|dangossych
y ỻythyr y neb onyt y uratmỽnt e|hun.
A minneu a|wnaf hynny yn|ỻaỽen heb·y
boỽn. Moessỽch y ỻythyr a|m march a|m
cledyf im. Nac ef heb·yr ermin. ry anesmỽ+
yth yỽ dy uarch di. a ry drỽm yỽ dy gledyf.
ac ỽrth hynny mi a baraf it balffrei esmỽ+
yth. a chledyf yscaỽn. Megys y geỻych yn
dirỽystyr kerdet ragot. Yn ỻawen. megys
y mynnych di arglỽyd heb·y boỽn. Y ỻythyr
a|gymerth ac esgynnu ar y palffrei a|wna+
eth. a mynet racdaỽ. A|r dyd hỽnnỽ educh+
er a|thrannoeth. a thradỽy y bu boỽn yn
kerdet heb gael na bỽyt na diaỽt. Y pedweryd dyd
yd|oed ef yn kerdet. y|gỽelei palmer yn
eisted. dan vric prenn. ac yn kymryt y gin+
yaỽ. a|phedeir torth maỽr o vara gỽenith
crỽn rac y uron. A dỽy gostreleit o|win.
ac y·gyt ac y doeth ar ogyfuch a|r palmer. ky+
| « p 213r | p 214r » |