Rhydychen, Llsgr. Coleg yr Iesu 111 (Llyfr Coch Hergest) – tudalen 227r
Ystoria Bown de Hamtwn
227r
912
ar* sỽper. y barỽneit a|r meibon a|deuthant
racdunt oc eu ystaueỻoed. A|phan|arganuu
y brenhin y meibon. galỽ a|oruc arnunt. ac
ỽynt a|doethant attaỽ yn|ỻawen. ac ynteu a
aeth dỽylaỽ mynỽgyl udunt. a|gouyn a|oruc
pỽy hynaf o·nadunt. Yn wir heb·y milys
hynaf yỽ gi. a|thi a|eỻy y wybot. kanys mỽy
yỽ y gorff ef no mi. a|phedroglach. Ac yna
bỽrỽ a|orugant eu mentyỻ y ỽrthunt. a redec
a|ỽnaethant ar hyt y ỻys. a|gi a|ragoraỽd ar
milys yn ychwanec y ỽrhyt. ac eu hargan+
uot a|wnaeth y bren* ud·unt a galỽ arnunt.
Gi heb y brenhin mi a|th wnaf yn urenhin
coronaỽc. a|m hoỻ urenhinyaeth a|rodaf.
Arglwyd heb ynteu os da gennyt nyt ueỻy
y|gỽney. namyn dyro y|m|tat os da gennyt.
kanys da y keidỽ|ef. ac nyt ỽyf uarch·aỽc urd+
aỽl inneu. a maỽr uu y ỻewenyd a uu yn|y
ỻys y|dyd hỽnnỽ. ac yuet y gỽin a|ỽnaethant.
a|phann oed gysgu arnunt y orffowys yd aeth+
ant. Weithon tewi a|wnaỽn am|ermin. a|dyỽ+
edut am iuor vrenhin kadarn. pa|wed yd|an+
uones y wyr y warandaỽ y ỽrth boỽn a
sabaoth. a milys. a|gi. a Josian priaỽt bo+
ỽn. a gỽedy kael whedleu y ỽrthun. an+
uon a|oruc ar hyt y gỽladoed y gynnuỻ
ỻu. ac yna y deuthant deg|mil ar|hugeint
o|wyr aruaỽc. hyt ar y weirglaỽd ydan
gasteỻ bratmỽnt. a maỽr oed y|son a|oed
gantunt. ac yna yd aeth boỽn y|r ystaueỻ
urenhinaỽl. a|gỽisgaỽ ymdanaỽ ỻuruc
a helym disgleiredic. ac a|wisgaỽd morgl ̷+
ei y gledyf ar y ystlys. ac a esgynnaỽd ar
arỽndel y uarch y myỽn korueu eureit.
ac y·gyt ac ef yd|oed deg|mil ar|hugeint
yn aruaỽc. a boỽn a|atwaenat arỽndel
y uarch. a|e urathu ac ysparduneu a|chyr+
chu un admiral oed y enỽ. a|e urathu a|e
waeỽ yny byryaỽd yn uarỽ y|r ỻaỽr. a thra ̷
barhaaỽd y waeỽ ef a|vyryaỽd a gyhyrda+
ỽd ac ef. A sabaoth a|gyrchaỽd araỻ. ac
913
a|e ỻadaỽd. ac yna boỽn a|dodes cri ac a|erch+
is y wyr y ffustaỽ. ac ỽynt a|wnaethant ỽrth
y ewyỻys. Yna y dechreuỽyt y urỽydyr. hyt
pan dryỻywyt y ỻurugeu. a hoỻti y tarya+
neu. hyt pan|uu drỽc y iuor y kyhỽrd y|dyd
hỽnnỽ. kanys pymthegmil o|wyr aruaỽc
a goỻes. Ac yna yd|ymchoelassant tu a mỽm+
braỽnt. a boỽn a sabaoth a|e hymlityaỽd. ac
ny thygyaỽd. ac ymchoelut a|orugant y
vratfỽrt dracheuyn. a thec oed y bydinoed
a|orchyuygaỽd boỽn. ac yna y|doeth ermin
yn erbyn boỽn ac y dywaỽt ỽrthaỽ. Oia|boỽn
heb ef maỽr a|beth yỽ dy|glot. ac y|myỽn
y|r ỻys yd aeth·ant. ac eu|diaruu a|orugant.
Chỽedyl iuor uu. galỽ ar y synyscal attaỽ.
a gouyn kynghor idaỽ. Ti wraenc heb ef
dyro gynghor im am uyg|gỽyr a|goỻeis.
arglỽyd heb ef. ti a|geffy gyghor da. anuon
ohonat hyt ym|babilon heb oet. att admi+
ral. y uenegi idaỽ. ac y erchi idaỽ dyuot a
phymthec brenhin coronaỽc gyt ac ef. a
chyt a phob un ugein|mil o wyr aruaỽc.
ỻyna gynghor da heb·yr iuor. ac yn diohir
gỽneuthur ỻythyreu ac anuon kenadeu
hyt ym|babilon. ac mal y gỽelas yr admiral
y ỻythyreu. ny orffỽyssaỽd yny|doeth ef a|r
pymthec brenhin gyt ac ef. ac ugeinmil gyt
a|phob un hyt ym mỽmbraỽnt. a|phan y
gỽelas iuor ỽynt ỻaỽen uu. a mynet yn eu
herbyn a|chyuarch gỽeỻ udunt ac eu gresaỽv
a|e kymryt gyt ac ef y|r ỻys. a menegi a|oruc
udunt yr hynn a|wnathoed ermin a boỽn
idaỽ. ỻad y wyr. a dỽyn y drysor yn ỻetrat. a
iosian y|wreic briaỽt. Yna y|dywaỽt yr ad+
miral. a|eỻy di broui hynny. Gaỻaf heb·yr
iuor. corf yn erbyn corff. da y dywedy heb
yr admiral. Yd|oed y boỽn yspiỽr yn gỽaran+
daỽ arnadunt. A phan|welas hỽnnỽ y
darpar a|oed gan y niuer hynny. ymchoelut
y vratfỽrt a|oruc. a menegi y boỽn ac y er+
min y darpar a|oed gantunt. a|phan|gigleu
| « p 226v | p 227v » |