Breudwd Rhyddiaith Gymraeg 1300-1425
English

Rhydychen, Llsgr. Coleg yr Iesu 111 (Llyfr Coch Hergest) – tudalen 229v

Ystoria Bown de Hamtwn

229v

922

a|m tir a|m dayar yn ryd y titheu a|minneu
ym mỽmbraỽnt. a gỽrtheb a|oruc boỽn idaỽ
a|dywedut mae da oed gantaỽ hynny. Ac
ar hynny dyrchauel eu dỽylaỽ. ac ymgadar+
nhau hyt pan oed diogel gantunt. Ac yn
gyflym yd|aeth y marchogyon y wiscaỽ ar+
ueu ymdanunt hỽynteu ac eu meirch.
ac yna y kerdassant ar ỻeiỻtu. a|gỽediaỽ
a|oruc boỽn ar duỽ yr hỽnn ny dywaỽt
kelwyd. Ac iuor oed yn gỽediaỽ ar vahum+
et. a|theruagaỽnt. ac apolin. ac yscynnv
a|orugant ar eu meirch. a|rodi dyrnodeu
maỽr mynych ar eu taryaneu. a|chedyrn
oedynt y ỻurugeu na thorrassant. ac ny
dygwydaỽd yr un onadunt. Ac yna tyn+
nu a|oruc boỽn morglei y gledyf. a tha+
raỽ iuor ac ef ar y helym dyrnaỽt maỽr
yny dygỽydwys y blodeu a|r mein y arnei.
ac hyt pan aeth y dyrnaỽt ar y march. yny
dygỽydaỽd y|march yn uarỽ y|r ỻaỽr.
Ynteu iuor a|gyuodes. a boỽn a|disgynnaỽd
rac kyhỽrd drỽc a|r march. A phan welas
Juor boỽn yn|disgynnu. tynnu cledyf a|oruc
a|rodi dyrnaỽt y boỽn ar y helym. yny dy+
gỽydaỽd y blodeu a|r mein gan y dyrnaỽt.
a blyghau a|oruc boỽn yna. a gỽneuthur
chwaen ffrangheid ffrỽythlaỽn. yssigaỽ
y uynỽgyl a|ỻad y benn. a|dygỽydaỽ a|ỽ+
naeth y corff ar y dayar. a belsabub a|a+
eth a|r eneit. Ac yna yd ymchoeles gi
urenhin ar y uarch att boỽn. a milys
a|deuth attunt. ac ar yr hynt honno yd of+
nockaaỽd y|bydinoed. ac yna y brathaỽd
gi y uarch att abraham. a|e|daraỽ. a da
y treỽynt y freinc a frỽythlaỽn. a milys
a|gyrchaỽd araỻ o|r sarassinyeit. ac a|e
ỻadaỽd. Nyt amgen no brenhin damasgyl
mab y abraham. a|boỽn uab terri a|lad+
aỽd araỻ. a sabaoth a vyryaỽd araỻ. a
therri duc ciuil a|ladaỽd admiral. a
boỽn o hamtỽn a|ladaỽd araỻ. ac enkyt
un aỽr y teruynỽyt y urỽydyr. ac yna

923

ar lann auon yd ymgynnuỻassant y sarassiny+
eit. ac yna y delit dec admiral ar|hugeint.
a|dec brenhin. ac a|e|dugassant gantunt y
vratfỽrt. ac yna y|dywaỽt y barỽn pennaf.
O|r mynnỽch chỽi caffel tir mwmbraỽnt.
reit uyd y·ỽch gaffel arueu y pauỽneit.
Kanys clotuorus yỽ marchogyon ffreinc my+
ỽn arueu. a|mi a|gyttuunaf a|chỽi. ac a
gredaf os mynnỽch creaỽdyr. ac a|ỽrthodaf
uahumet uyn|duỽ. a theruagaỽnt. Ac ueỻy y
dywaỽt y pymthec brenhin. ac ar y geir hỽnnỽ
y brathassant eu meirch tu a|r ỻys. Ac yn
gyntaf y barỽn pennaf ym mỽmbraỽnt.
ac yn|y|ol ynteu gi urenhin. a chyt ac ef
pymtheg|mil yn|y ganlyn. ac ody uaes yd
oed boỽn yn gỽneuthur marthyrolyaeth maỽr.
A phan|welas y pauỽneit hynny trist uuant.
a|r porth cỽlis a|estyngassant. a gi ody vyỽn
a chyt ac ef mil o uarchogyon clotuorus.
a phan welas y pauỽneit ỽynt yn|dyuot y
lys iuor. ffo a|orugant ac nyt arbedassant
na maỽr na bychan eithyr a|welynt ar ureint
medygon o·nadunt. ac heb ohir na·chaf
hen boỽn yn|dyuot attaỽ. a|e niuer gyt ac ef.
Ac yna yd|aeth gi urenhin yn erbyn boỽn.
a dywedut ỽrthaỽ. Syr heb·y boỽn duỽ a|dalo
itt. Ac yna a|or anuon a|orugant yn|ol io+
sian y uratfỽrt. ac yn ol escyb ac yscolheigon
gỽybodus. hyt na|thrigyei neb heb dyuot.
Ac yn|ol brenhin damascyl heuyt. ac a|uyn+
nei gret ar gyhoed. ac a|uynnei heb ohir y
uedydyaỽ. Heb·y brenhin damascyl mi a|uyd+
af gristaỽn. ac a|ỽrthodaf deruagaỽnt.
Ac ueỻy y dywaỽt paỽb gyt ac ef. Yna y
dywaỽt boỽn. dygỽch yma deruagaỽnt.
ac y gossodassant ef yn|y seuyỻ rac bronn
boỽn. Mahumet heb·y boỽn ti a|uuost uaỽr+
hydic eiryoet. gỽna hediw ffrỽyth maỽr.
ac yna y kymerth boỽn ffonn bres. ac y
treỽis teruagaỽnt ac ef. a|r escob a vyryỽys
dỽfyr sỽyn sỽyn* arnunt. ac yna y neidaỽd
costaỽc·ki coch ohonaỽ. ac y ffoaỽd. Edrychỽch
heb·y boỽn