LlB Llsgr. Ychwanegol 19,709 – tudalen 67v
Brut y Brenhinoedd
67v
a|dangossynt y vot yn telynaỽr. ac o|r diwed gỽedẏ
na thybygei neb y vot ef yn tywyssaỽc falst mal
yd oed. nessau a oruc parth a|muroed y gaer dan
ganu y telẏn. a gỽedy y adnabot o|r gỽyr o vyỽn. ẏ
tynnu a|orugant vrth raffeu y myỽn. a gvedy gve+
let ohonaỽ y vraỽt. ymgaru a|orugant megys
na|r ymwelynt drvy lawer o yspeit kyn·no hẏnnẏ
ac val yd oedynt veỻy yn medylyaỽ ac yn keissaỽ
ystryỽ py wed y geỻynt ymrydhau odẏno. ac yn
annobeithaỽ o|e rydit. nachaf eu ken·nadeu yn dẏ+
fot o germania a|wech chan|ỻog yn ỻavn o varch+
ogẏon aruaỽc gantunt a|chledric yn dywyssaỽc
arnadunt. ac yn diskynnu yn yr alban. a gỽedy
clybot hynny o arthur. ym·adaỽ a|oruc ynteu a|r di+
nas rac petruster ymlad a|r veint nifer hỽnnỽ
a mynet odyno hyt yn ỻundein. ac yno galỽ at+
taỽ a oruc hoỻ wyrda y teyrnas. yscolheigon a ỻe+
ygyon ac ymgygor ac|vynt. beth a wnelhynt am
hyny. sef a|gaỽssant o gygor y kvnsli hỽnnỽ an+
uon kennadeu a orugant hyt ar hỽel uab emyr
ỻydaỽ. brenhin brytaen vechan. y venegi idav
yr ormes a|dathoed gan y|paganyeit y|ynys. prydein.
kanys nei vab chỽaer oed hvel y arthur. a gỽedẏ
clybot o hỽel y ryfel a|r aflonydỽch a oed ar y|e+
wythyr. erchi paratoi ỻyges. a chynuỻaỽ pym+
theg|mil o varchogyon aruaỽc. ac ar y gỽynt kyn+
taf a gafas yn|y ol y deuth y borth hamỽnt y|tir
| « p 67r | p 68r » |