LlB Llsgr. Cotton Cleopatra A XIV – tudalen 48v
Llyfr Cyfnerth
48v
bieu trayan gobreu merchet y tayogeu A| th+
rayan camlyryeu ac ebediweu y tayogeu
A thrayan eu hyt pan fohỽynt or wlat.
A thrayan yr yt ar bỽyt o pop marỽ·ty tay ̷+
aỽc. Maer a| bieu ranu pop peth. A righyll
bieu dewis yr brenhin. Or dam·weinha
yr maer na allo dala ty. kymeret y tayaỽc
a dewisso attaỽ ulỽydyn or kalan mei y| gi ̷+
lyd. A mỽynhaet ef laeth y| tayaỽc yr haf.
Ae yt y gynhayaf ae uoch y gayaf. A phan
el y tayaỽc y ỽrthaỽ hagen. gatet idaỽ pe ̷+
deir hych maỽr a| baed ae ysgrybyl ereill
oll. Ac ỽyth erỽ guanhỽynar. A phedeir
erỽ gayauar. Ar eil ulỽydyn ar| tryded y
gunaet uelly ac nyt yr vn tayaỽc hagen.
Odyna ymborthet teir blened ar yr eidaỽ.
guedy hynny guaredet y brenhin arnaỽ
os myn o rodi tayogeu idaỽ yn| y mod gynt.
Pan gollo dyn y anreith o gyfreith. y ma+
er ar kyghellaỽr a gaffant yr aneired ar
enderiged ar dinewyt. Ran deu hanher
| « p 48r | p 49r » |