Llsgr. Caerdydd 1.362 (Hafod 1) – tudalen 72r
Brut y Brenhinoedd
72r
po na bo gorleis vych di. A mi a|ỽnaf vlphin yn
rith iỽrdan o tintagol gỽas ystauell y brenhin oed
hỽnnỽ. A ninheu* a gymeraf drych arall arnaf.
Ac af yn tyted* gyt a chỽi Ac y velly y gelly ti.
yn eohouyn* vynet y gastell tintagol. A chaffel
y|wreic ỽrth ty gyghor ti. A gorchymyn a oruc y
brenhin y annỽyleit warchadỽ y kastell yn da. A
chynhal yr ymlad. Ac ymrodi a|ruc* ynteu y gel+
uydydeu myrdin. Ac yna y rodes myrdin arnaỽ
ef drych gorlois. Ac ar vlphin drych drych* iỽrdan.
o tintagol. Ac arnaỽ e hun drych brthael arall.
megys nat oed neb o|r a|e gỽelhei a|ỽypei na bei y
gỽyr hynny vydynt yn|y gỽir drych Ac odyna
kymryt eu hynt a|wnaethant parth a chastell
tintagol A phan doethant yno; yd oed yn gyf+
lychỽr. A gỽedy menegi yr porthaỽr bot y iarll
yn|dyuot. egori y pyrth a oruc yn diannot. Ac eu
ellỽg y myỽn. kanyt oed neb o|r a|e gỽelei a|ỽy+
pei na bei y iarll vei. Ar nos honno kyscu a oruc
y brenhin gyt ac eigyr gan ym·rodi y damune+
dic serch. kans y falyst drych a rodassei vyrdin
arnaỽ a tỽyllassei y|wreic. A* y gyt a hynny gei+
reu tỽyllodrus dych·ymyguaỽr a dywedei ynteu.
kans dywedut ỽrthi a|wnaeth y ry|dyuot yn
lledrat o|r kastel kany allei yr dim bot heb y
gỽelet rac meint y amgeled ymdanei. ỽrth ỽy+
bot py ansaỽd a vei arnei ac ar y kastell. A
chredu a|wnaeth hitheu yr ymadrodyon hynny
a gỽneuthur y vynnu ef. Ar nos honno y moruorỽyn
| « p 71v | p 72v » |