Llsgr. Caerdydd 1.363 (Hafod 2) – tudalen 27r
Brut y Brenhinoedd
27r
ryded a rodeys y ỽdỽnt wy am dvgant
ynheỽ yn dyanrydedassant* ynheỽ. Ac a dan
kwynaỽ y aghyfnerth a|e aghanoctyt yn|y
wed honno ef a doeth hyt yg karytya y dynas
yd oed y ỽerch yndaw. Ac anvon kennat a w+
naeth at y ỽerch y ỽenegy ydy yr ryw aghyf+
nerth ry kyỽaroed ac ef. ac nat oed ydaỽ na bw+
yt na dyllat a|e ỽot ynteỽ yn dyvot y keyssyaw
y trỽgared hytheỽ. A phan kygleỽ y ỽerch yr a+
madrodyon hynny wulyaw a orỽc a goỽyn pa
saỽl o ỽarchogyon a oedynt y gyt ac ef. Ac gwe+
dy dywedwyt o|r kennat nat oed namyn ef ac
ỽn esweyn y gyt ac ef. Sef a orỽc hytheỽ yna
kymryt amylder o evr ac aryant ac anỽon yn
llaw y kennat. ac erchy mynet a|e that odyno
hyt ym meỽn dynas arall. a chymryt arnaỽ y ỽot
yn glaf a gwneỽthỽr enneynt ydaỽ a|e artymhe+
rỽ a ssymỽdaỽ y dyllat. a chymryt attaỽ try ỽ+
geyn marchaỽc ac eỽ kyweyryaỽ yn hard kym+
yrredỽs o ỽeyrch a dyllat ac arỽeỽ. Ac gwedy
darffey hynny anỽon o ỽlaen at aganyppvs b+
renyn ffreync ac at y ỽerch yntev a dywedwyt
y ỽot yn dyỽot. Ac gwedy darỽot gwneỽthỽr
| « p 26v | p 27v » |