Rhydychen, Llsgr. Coleg yr Iesu 57 – tudalen 187
Llyfr Blegywryd
187
arglỽyd groes yn|y tir yny vei diamrysson. a|gỽ+
neuthur o vn ohonunt adeil. ef a|dyly coỻi y
adeil. ac ny dyly coỻi y|dir. A|oes un groes y|dyly+
er talu deu gamlỽrỽ amdanei. Oes. O|r|deruyd
y dylyedaỽc amrysson am|tir a|e groessi o|r haỽl+
ỽr. ac na bo yr|amdiffynnỽr ỽrth y groes. a|bar+
nu y|tir y|r amdiffynnỽr. yna y|mae iaỽn barnu
camlỽrỽ ar|yr haỽlỽr am groessi y tir. a chamlỽ*
ar yr amdiffynnỽr am na|bu ỽrth y groes. A oes
un estraỽn a|dylyo talu galanas gyt a|ỻofrud
a|charant heb y dalu. Oes. O|r|deruyd y dyn ỻad
dyn araỻ. a|dygỽydaỽ galanas arnaỽ. a meicheu
arnei. a chynn talu yr alanas y dỽyn o|e uam y
dat araỻ. yna y dyly y genedyl y bu ef ar eu
breint. talu gyt ac ef yr alanas honno. ac yna
y dyly estraỽn talu kymeint a braỽt neu ge ̷+
uynderỽ. A|oes anghyuarch adeuedic yny*
dylyer y diuỽyn. Oes; O|r|deruyd y dyn bot da
idaỽ y·gyt ac araỻ. a|e dreulaỽ o·honaỽ heb
wahard. ny dylyir arnaỽ na dirỽy na cham+
| « p 186 | p 188 » |