LlGC Llsgr. Llanstephan 27 (Llyfr Coch Talgarth) – tudalen 47v

kanys amlỽc yỽ na med irllaỽn arnaỽ e|hun. Yr yspeilyedic

o bop da a yspeilyr ual y dywetpỽyt uchot. kanny cheiff ef leỽ+

enyd yndaỽ e|hun. nac yn|duỽ nac yn|y gyfnessaf. trỽy dristyt

y poenir ef heb dim ỻewenyd. Yn nessaf y hỽnnỽ y|daỽ chwant

yr|hỽnn a|vỽrỽ y poenedic y geissaỽ ỻewenyd yn|y petheu byda+

ỽl. kann coỻes ysprydaỽl lewenyd a|oed yn|y gaỻon. kanys a+

ny˄anaỽl yỽ y eneit na digaỽn uot heb ryỽ lewenyd. ae yn|y byt

hỽnn ae rac ỻaỽ. Yn nessaf y hỽnnỽ y daỽ glythineb. yr hỽnn

a lusc ac a|dynn y bryt chwannaỽc achubedic yn|y petheu

tranghedic odieithyr hyt ar ormod bỽyt a|diaỽt. Yn ol hỽn+

nỽ yn diwethaf oỻ y daỽ godineb. yr hỽnn  a ostỽng y tỽyỻe  ̷+

dic y geithiwet pechaỽt. ỽrth hynny trỽy syberwyt y hỽyda y

gaỻon. trỽy gynghoruynt y gỽyỽha. Trỽy irỻoned y tyrr. trỽy

dristyt y briwir. trỽy gebydyaeth y gỽesgerir. trỽy lythni y

buttreir ac y gỽlychir. trỽy odineb y sethrir megys yn ỻỽch

hyt yr eigyaỽn. Y wedi gyntaf o|r pader a|dodir yn erbyn sybe+

rwyt pan dywetter. Sanctificetur nomen tuum. Sef yỽ dyaỻ

hynny. Kadarnhaer dy enỽ di arglỽyd. ual y bych dat ti ynni

a ninneu yn veibyon y titheu. ual y bo arnam dy ovyn a|th

garyat. a|th anryded. yny ymchoelom ni attat ti trỽy uuuỻ+

daỽt. megys yr ym·adaỽsam a thi trỽy syberỽyt. yn|y wedi

honn y rodir daỽn yspryt ovyn y dyn. Trỽy yr yspryt hỽnnỽ

y dywedir ar u·uuỻtaỽt. yny gaffo yr uuud deyrnas gỽlat

nef trỽy u·uuddaỽt. yr|hỽnn a goỻes y syberỽ trỽy syberỽyt

megys y dyweit crist yn|yr euengyl. Gỽynn eu byt yr anghe+

nogyon uvud. kanys ỽynteu bieu gỽlat teyrnas nef. Yr|eil wedi

yssyd yn erbyn kynghoruynt. nyt amgen. Adueniat regnum

tuum.