LlGC Llsgr. Llanstephan 27 (Llyfr Coch Talgarth) – tudalen 87r
Mabinogi Iesu Grist
87r
a hi a|dalaỽd diolỽch y duỽ ac a dywaỽt yna Gỽ edỽ oed+
ỽn ac nyt ỽyf beỻach. Diffrỽyth oedỽn a beichaỽc ỽyf yr
aỽr·honn. a ỻewenyd a gymerth y chyfnessafyeit a|e chedym+
deithyon am hynny. a naỽ mis gỽedy hynny y ganet merch
y anna. a meir vu y henỽ. a gỽedy meithryn y verch deir
blyned yd|aeth Joachim ac anna y demyl duỽ y wneuthur
aberth y duỽ o rodi meir yn|ỻaỽ·vorỽyn y duỽ. a|e gossot yng
kedymdeithyas y gỽerydon. yr honn hyt dyd a|hyt nos a
lauuryei yng|gỽassanaeth duỽ. A gỽedy y gossot rac bronn
y demyl hi a|esgynnaỽd pymthec o|r gradeu yn|y demyl. hyt
nat edrychei ueir ar neb o|e rieni ual y gnottaei uabaỽl
ieuengtit. ac am hynny y ry·uedaỽd paỽb o|hyneif yr eglỽys.
Yna y|dywaỽt anna yn gyflaỽn o|r yspryt glan y|nghyfedry+
chedigaeth paỽb. Duỽ arglỽyd ỻuoed heb hi cof yỽ ganthaỽ
ef a|dywaỽt. ef a|ovỽyhaa duỽ y bobyl o lau dramỽy. yny
drossei ef y kenedloed a chaỻonneu y rei uvud. ac ef a|ago+
res y glusteu ar yn gỽedieu ni. ac a|beỻaaỽd y ỽrthym kyrch+
eu yn|gelynyon. Diffrỽyth oed y uam a|hi a uagaỽd ỻewe+
nyd a goruchelder yn|yr israel. yr aỽr·honn y gaỻaf|i rodi
offrỽm y duỽ. ac ny dichaỽn vyng|gelynyon vyng|gỽahard.
Duỽ a|drosses y rei hynny y ỽrthyf|i. ac a|rodes ym lewenyd
tragywydaỽl. Ac yna yr|oed veir yn ryuedaỽt gan y bobyl
yr honn a gerdei gam ebrỽyd a hi yn|y theirblỽyd. ac yn
berffeidyach no neb y dywedei. ac ueỻy yd oed hi yn wastat
yn astudyaỽ y myỽn molyanneu duỽ. hyt na|thebygit y
bot yn verch namyn yn vaỽr y hoet. kanys kyn brudet yr
ymrodei y wedieu a|chyt bei dengmlỽyd ar|hugeint. a|e hỽyneb
| « p 86v | p 87v » |