LlGC Llsgr. 3035 (Mostyn 116) – tudalen 164r
Brut y Tywysogion
164r
yd ym·gynuỻassant y ieueinc yn·vydyon y|wlat o bop
tu attaỽ o dybygu goruot ohonaỽ ar pop peth o|achaỽs
y|damwein hỽnỽ. kanys casteỻ a oed y|gỽyr a losges ef o gỽ+
byl a|ỻad ỻawer o|wyr ynda*. ac yna yd edewis gỽilim o
lundein y casteỻ rac y ofyn a|e hoỻ aniueileit a|e hoỻ olu+
doed a gỽedy daruot hẏnẏ. Megys y dyweit selyf drychafel
a|wna ysprẏt yn erbyn kỽymp dyn. Yna yd aruaethaỽd
yn|chỽydedic o valchder ac o draha yr anosparthus bobyl
a|r ynuyt giỽdaỽt. kyweiraỽ ynuydyon deithiau o|dyfet y geredigyaỽn
a|chymryt gỽrthỽynebed y|r gyfyaỽnder Gỽedy galỽ o kediuor
ap goronỽ a hỽel ap idnerth a|thrahaern ap ithel y rei a oe+
dynt yn dynessau o gyffnessafrỽyd gerenyd a|chyfadnabot
a|duunaỽ arglỽydiaethu idaỽ a|r rei hẏnẏ a oedynt gyt ac
ef ymlaen hoỻ|wyr keredigyaỽn. ac nyt oed dim a aỻei vot
yn direitach no|r kediuor hỽnỽ. y|r wlat a·ghyfredin kẏmrẏ
noc·yt a·daỽ dyfet yn ỻaỽn o amryuaelon genedloed nyt
amgen. flemisseit a|freinc a|saesson a|e giỽdaỽt|genedyl e|hun.
y|rei kyt beint vn genedyl a gỽyr keredigyaỽn eissoes ge+
lynyon galoneu oed gantunt o achaỽs eu hanesmỽythdra
a|e hanuundeb kyn no hẏnẏ. ac yn vỽy no hyny rac ofyn y
tremyc a|wnathoedynt y henri vrenhin. Y|gỽr a dofhaassei hoỻ
benaduryeit ynys prydein o|e aỻu a|e vedyant. ac a|darys+
tygassei wlawer* o|wladoed tra mor ỽrth y|lywodraeth rei
o nerth arueu ereiỻ o aneiryf rodyon eur ac aryant ẏ
gỽr nys dichaỽn neb ym·yscrin ac ef eithyr duỽ e|hun. y
neb a|rodes ef y|medyant idaỽ. a gỽedy dyfot gruffud ap
rys yn gyntaf y deuth y is|coet. ac yna y|kyrchaỽd y ỻe a
elwir blaen porth hodnant yr hỽn a a·deilassei neb un fle+
| « p 163v | p 164v » |