LlGC Llsgr. Peniarth 11 – tudalen 191r
Ystoriau Saint Greal
191r
y rei a|oedynt elynnyon y laỽnslot. A|r vorỽyn a|drigyaỽd y+
n|y ty. ac a|vedylyaỽd y ỻadei hi efo os gaỻei. o neb ryỽ fford.
Ac yr cỽplau y medỽl y cỽplaaỽd hi y tynnaỽd y gledyf ef o|e
wein. drỽy edrych pa fford haỽssaf y gaỻei hi y lad ef. a|hi a
wydyat vot y penn ef yn aruaỽc. ac nat oed le noeth idaỽ o+
nyt y wyneb. ac a|uedylyaỽd na allei hi y lad ef nac ar|dyrna+
ỽt nac ar|deu. ac a|vedylyaỽd pei gaỻei hi heb wybot idaỽ ef
dyrchafel arffet y luryc y gaỻei y lad kanys hi a|dyrrei y
cledyf yn|y voly ~ ~ ~
A C ar hynny ef a|welei laỽnslot drỽy y hun. bot corr+
gi yn|y gyfarth. a phump costaỽc tom y·gyt ac ef yn|y
hapeaỽ o|pop parth idaỽ. a Miliast ygyt ac ỽynt yn|y temigiaỽ.
Ar|hynny deffroi a|oruc ef ac ymauael a|gỽein y gledyf. Eis+
syoes neur daroed crib·deilyaỽ y cledyf y arnaỽ ef. a|r marcho+
gyon yn|dyuot y myỽn. A|r|uorwyn yna a|dywaỽt. ef a we+
ler heb hi pa delỽ y dialaỽch chỽi ar laỽnslot. a hitheu e
hun yn gyntaf a|hỽylyaỽd idaỽ. a|r pump marchaỽc o|bop
parth idaỽ. Yna laỽnslot gymerth y waeỽ ac a|hỽylyaỽd
y|r meistrolaf o|r pump marchaỽc. ac a|e|trewis yny vyd y
gỽaeỽ trỽydaỽ mỽy no ỻatheit o hyt. Ac yn|y dynnu attaỽ
ef a torres. Ac yna hỽylaỽ a|oruc ef tu ac att y vorwyn y
geissyaỽ y gledyf a|e ysglyffyaỽ o|e dỽylaỽ a|oruc. a|r pedwar
ereiỻ a|oed am y penn ef yn|y gystudyaỽ. ac ynteu a|dyrchaf+
aỽd y laỽ ar vedyr taraỽ vn o·nadunt. Ac yna y vorwyn
a neityaỽd y geissyaỽ dala laỽnslot. ac yn hynny y dyrnaỽt
a|disgynnaỽd ar y phenn hi. yny hyỻt hyt y dỽyn ysgỽyd. A
phan weles y pedwar marchaỽc y vorwyn yn varỽ a|e meistyr
| « p 190v | p 191v » |