LlGC Llsgr. Peniarth 15 – tudalen 8

D ẏw Sul dẏd etholedic ẏnẏ* yr hwn y|danvones dvw viangel ẏ|dan+

gos trwẏ vrevdwyd y bawl ebostol yr hẏn a|ydoed yn damvnaw

ẏ|welet Sef oed hẏnnẏ poenev vffernn A|phan yttoed bawl yn mynet

dẏbẏget ef ẏgẏt a Mihagel ef a|welas geir bron pyrth vffernn Deri

tanlẏt Ac wrth ẏ keinckev pechadvrẏeit yngroc. Rei onadvnt geir

blew ẏ pennev. Ereill geir ẏ|tavodev. Ereill ygeir* ẏ|mẏnẏglev Ereill geir

ẏ|dwẏlaw. Ereill geir ẏ breichev. Ac yna ẏ|gwelas pawl yn lle arall ff+

wrn ẏn lloski A|seith flam amliw yn kẏvodi o·honei a llawer yn|y poeni yn+

di ac yngylch ẏ|ffwrnn ẏd|oydẏnt Seith pla kyntaf oed eira A|r eil oed

tan a|r tryded oed|Ja. Pedẏwared* oed gwaet. Pymhet oed Seirf Ch+

wechet oed mellt. Seithvet oed drewant Ac y|r ffwrnn hon yd|anvonir

eneidẏev yr rei nẏ wnel ẏ penẏt a|ossoter arnvnt n |ẏ|bẏt ẏma Rei o+

honvnt yn wylẏaw Ereill yn|grithvan Ereill yn|keissẏaw ẏ|hagyev

Ac nẏs kefynt kanẏs nẏ|bẏd marw eneit ẏn dragwẏddawl Ac am

hẏnnẏ lle ofnawc yw vffern yn lle ẏ|mae tristwch heb lewenẏd a|dolvr tra+

gywyd Ac amylder o|dagrev a|chwynvan callon ac oervel mawr drwẏ losge+

digyaeth eneidev Yno y mae Rot o|dan a|mil o|yrev arnei a|diefẏl a|e try

vnweith bevnyd Ac ar bop tro ẏ llysc mil o|eneidev Odẏna ẏ|gwelas

Pawl avon arvthvr yn llawn o|brẏfet kẏthrevlic megys pẏscawt n* |ẏ mor

yn llẏngkv eneidev dẏnẏon megẏs bleidev ẏn llyngkv deueit Ac ar yr avon

honno ẏd|oed bont ẏd|aei ẏr|eneidev kyfyawn idi yn didramgwyd Ac eneidev

y pechadvrẏeit a|dẏgwẏdẏnt dros ẏ bont Llawer o|bresswẏlvaev drwc ẏsẏd

yn vffern megẏs ẏ|dyweit yr evengẏl am yr eneidev drwc Rwẏmwch hwynt

yn faglev o|e llosgi Yno ẏ poenir kẏfelẏb ẏ·gẏt a|e gẏfelẏb godinabvs gyt|a

godinabvs Treiswyr gẏt a|threiswraged Enỽir gẏt Ag|enwirẏon a|phawb

a|gerdei ẏ|r bont herwẏd ẏ|gobrwẏei Ac ẏ gwelas pawl llawer o|eneidev ym

poen ẏno Rei o·honvnt hẏt ẏ|glinnẏev ereill hẏt y|bogelev Ereill hẏt ẏ

gwevussev ereill hẏt ẏ haylev Ereill hẏt ẏ|gwarthaf ẏ|pennev Yna yd|wy+

lawd Pawl ac ẏ govynawd y|r aghel pwẏ oẏdẏnt ẏ rei hẏnnẏ Heb yr|agel

yna y|rei a|welẏ di hẏt y glinev a|oganassant ereill pan elẏnt y|r eglwẏssev

A rei a|welẏ hẏt y|bogelev a|wnaethant pechawt godineb Ac nẏs penydas+

sant hẏt angev E|rei a|weth* di hẏt y|gwevẏssev A|oganassant mewn eglwy+

ssev heb warandaw geirev dvw. Y rei a|welẏ di hẏt ẏ|haelev a lawen+

assant o|gwẏmpev ẏ|kymodogẏon Odẏna ef a|welei le ofẏnawc yn|gyflawnn

o|wyr a gwaraged* ẏn knoi ẏ|tavodev Llyma heb yr angel yr ockyrwẏr a

wnaethant ockyr Ac nẏ bvant drvgarawc wrth ẏ|gweineint Ac am hẏ+

nny y|bẏd ẏ|poenev hẏn arnvnt hẏt dẏdbrawt Odyna pawl a welas lle

arall a|phop ryw boen yndaw Ac ẏno yd oedynt morynyon dvon py+