LlGC Llsgr. Peniarth 32 (Y Llyfr Teg) – tudalen 124
Llyfr Iorwerth
124
yr|eglỽys. A|chroesset racdaỽ na thygo annu+
don. ac os tỽg; tyghet yn|gyntaf ar|drỽs yr
eglỽys. a|r eil ar drỽs y gangheỻ. a|r trydyd
ar yr aỻaỽr. Ac yna deuet yr offeiryat att
y raclaỽ. a dywedet ry gaffel kỽbyl. A|r rac+
laỽ a|dyly tyghu ry gaffel kỽbyl pan holo
y dyn yn|y dadleu. ac yn erbyn hynny ny
eỻir dim. Ny byd eneit·uadeu ef yr hynny.
namyn ỻeidyr gỽerth. ac o·ny eiỻ kaffel y
werth; deholer ual ỻeidyr. Ereiỻ a varn
gadu gỽat. yr gyrr y raclaỽ ual yr gyrr y
perchennaỽc. a hỽnnỽ mỽyhaf y coela gỽyr
gỽyned idaỽ. O|deruyd y dyn kaffel kic ani ̷+
ueil ny bo eidaỽ ae gan gỽn ae yg|kudua
araỻ. a|e gymryt o·honaỽ heb ganhat. di+
rỽyaỽc vyd hyt yd|el nac o bryn nac o rod
nac o wadaỽl. hyt y ganuet laỽ. ac ỽrth
hynny y gelwir ef kehyryn kanhastyr. ac
nyt a beỻach hynny.
P ỽy bynnac a vynno daly ỻedrat yn
llaỽ araỻ. deuet uch·benn y peth a
dalyo. a gouynnet pỽy a|wercheidỽ hỽnn.
Ony byd neb a warchattỽo y peth; kyme+
ret ef ganhat y gymryt yr|eidaỽ. A gỽedy
kaffo ef ganhat; aet y fford att yr ygnat.
ac ual y manacko yr ygnat idaỽ damdyget
| « p 123 | p 125 » |