LlGC Llsgr. Peniarth 32 (Y Llyfr Teg) – tudalen 158
Llyfr Iorwerth
158
ewyỻys o|r pryt y gilyd. kanny byd marỽ vn ỻỽ
dyn yr y warchae o|r pryt y gilyd. Y teirỽ o han ̷+
ner haf hyt aỽst ny dylyir eu daly ar yt nac
ar weỻt. kanys yn|yr amser hỽnnỽ y byd terwe+
nyd ar y gỽarthec prouadỽy. Nyt iaỽn daly
tarỽ vn amser yn ol buch derwenyd. Nyt iaỽn
daly beid vn amser yn mochyrya. Ny dylyir da+
ly meherein na bycheu o wyl vihagel hyt ga+
lan gayaf. Ny dylyir daly ebaỽl yn ol y vam
ar gerdet. a hỽnnỽ a elwir saeth·ebaỽl. Ny dylyir
daly moch ar yt ony cheffir yn yr yscubaỽr neu
ar weirglaỽd o wyl Jeuan hyt y kalan.
P ỽy bynnac a vynno kadỽ gỽeirglaỽd.
kadỽet o wyl badric hyt galan gaeaf.
Sef yỽ gỽeirglaỽd; tir diuỽynyant namyn y
weir. a chlaỽd gỽneuthuredic yn|y gylch. Sef
achaỽs y ketwir hyt galan gayaf; ỽrth dylyu
y lad dỽy·weith. Pỽy bynnac a|gaffo yscrybyl
ar y ryỽ weirglaỽd honno; kymeret o·honei ual
o|r yt. O|deruyd idaỽ ynteu na ordiwedo yr ysgry+
byl arnei. kyt adefho eu ry|uot. ny dylyir di+
uỽyn ỻỽgyr am weỻt. Pỽy bynnac a|wnel kae
yngkylch y yt; dalyet ar y gỽeỻt a|vo yndaỽ ual
ar yr yt. kanny eỻir gỽeỻtpaỽr yno. Ny dyly neb
gỽeỻtgadỽ amgen no|r|deuweỻt. kae. a gỽeirgla+
ỽd. ac os mynn y gadỽ; kymeret groes y|gan arglỽyd
| « p 157 | p 159 » |