LlGC Llsgr. Peniarth 36A – tudalen 12r
Llyfr Blegywryd
12r
Ef e hunan vn weith ae tỽg. Pỽy bynhac
a pryno da y gan arall. ac a uo mach e| hu ̷+
nan dros y gỽerth. ae varỽ kyn talu. ac
adaỽ yd y gan gedymdeithon y da. yr haỽl ̷+
ỽr a dyly tal or da hỽnnỽ. kanys y marỽ
a uu vach kynnogyn idaỽ biewed y da.
Ef a dyly tygu ar y seithuet or dynyon
nessaf y werth ar ved y talaỽdyr or dich ̷+
aỽn y gaffel. Ac onys dichaỽn ar allaỽr
gyssegredic. gỽerthu o·honaỽ y da idaỽ. a
bot hỽnnỽ yn vach kynnogyn idaỽ yn ̷+
teu dros werth y da. Pỽy bynhac a uo
mach goruodaỽc dros arall. ny rydheir
hyt ym|pen vn dyd a blỽydyn. Ac ny
phoenir o vyỽn hynny. dros y kam a
wnel hỽnnỽ. kanys megys rỽymedic
yỽ y myỽn yr achaỽs hyny ỽyppo a del
y kylus ỽrth gyfreith ae ny del kyn y ter ̷+
uyn. Pỽy bynhac a gymero mach ar
dylyet. a marỽ y mach kyn talu y dylyet
doet ar ued y mach a thyget ar y seithuet
or dynyon nessaf y werth y ryfot hỽnnỽ
yn vach idaỽ ar y dylyet. or keiff y bed.
| « p 11v | p 12v » |