Breudwd Rhyddiaith Gymraeg 1300-1425
English

Llsgr. Amwythig 11 – tudalen 90

Ystoria Adda

90

hynn ẏ·dan wreideu ẏ tauaỽt ac ef a gyuyt o+
nadunt teir gỽialen vn o·nadunt vyd rẏỽ ce+
drys Ẏ˄r eil vẏd cipressus ẏ tryded epinus drỽẏ
cedrus ẏ deellir ẏ tat o|r nef kanys uchaf
pren ẏ tỽf ẏỽ trỽẏ cipressus ẏ deellir y mab
kanẏs goreu pren ẏ aroglon ẏỽ a melyssaf
ẏ frỽẏth drỽẏ Epinus ẏ deellir yr ysprẏt g+
lan kanys amlaf yỽ ac yna y doeth Seth at
ẏ dat a|e neges gantaỽ ẏn rỽyd A menegi
a oruc idaỽ oll ual ẏ gỽelsei A llawen vu
Adaf am hynnẏ llyma ẏr unweith ẏ chỽar+
dỽys Adaf yr pan doeth y|r dayar ac o hẏt ẏ l+
ef dywetut arglỽyd digaỽn hir ẏd ỽyf uy+
ỽ kẏmmer vẏ eneit ac o hẏnnẏ marỽ vu
Adaf o vẏỽn ẏ tridieu megẏs ẏ dywaỽt yr
aghel ac ẏ cladỽẏs Seth ef ẏ glyn ebron ac
ẏ dodes ẏ tri gronẏn ẏn|ẏ eneu dan ẏ|tauaỽ+
t o|r rei ẏ kẏuodassant teir gỽẏalen o vẏỽn
ẏ amser byr o|hyt gỽẏalen llath yno ẏ bu
ẏ gỽẏal hynnẏ ẏn seuẏll o Adaf hẏt ar Noe